Градоначалникот на Охрид Никола Бакрачески денес оствари работна средба со поранешниот градоначалник и актуелен советник во Советот на германскиот град Дортмунд , Рутиге Шмит. На средбата двете страни се сложија дека има реална основа за соработка помеѓу Охрид и Дортмунд на повеќе полиња и дека ова ќе биде само еден добар почеток за широка и долгорочна соработка помеѓу двата града.
Според охридскиот градоначалник целта на средбата е воспоставување на соработка која што ќе има реални основи да се одржи во иднина и би дала долгорочни резултати помеѓу македонскиот ,Охрид и германскиот град Дортмунд.
„Разговаравме за можностите за соработка во полето на културата и една од нашите заложби беше за наредното издание на фестивалот “Охридско Лето“да донесеме некои од уметниците од Дортмунд за што ја разгледавме и можноста нивната филхармонија да настапи на овој наш реномиран музички фестивал. Разговаравме за можностите за промоција и афирмација на градот Охрид во делот на туризмот меѓу тур операторите и туристичките работници во Дортмунт и околината како и можностите за привлекување на поголем број туристи од овој регион на Германија кон градот Охрид што би значело и евентуално воспоставување на идни чартер летови од охридскиот аеродром кон градот Дортмунд. Другиот дел на разговорите го посветивме на можностите за културна размена меѓу овие два града во делот на изучување на германската култура и јазик во Охрид со поддршка на стручни лица односно учители кои тие би ги пратиле од овој германски град а кои предавања овде би се организирале како бесплатни курсеви за нашите граѓани со што би ги изучувале и германскиот јазик и култура“, изјави непосредно по средбата градоначалникот Бакрачески.
И господинот Рутиге Шмит покажа волја за соработка помеѓу овие два града, и изрази желба да преземе голем број активности за воспоставување на тесна соработка на повеќе полиња.
„Се ќе направам и моја желба ќе биде ако започне соработката, меѓу двата града. Прво бесплатно изучување на германски јазик кај вас и настап на филхармонијата од Дортмунд на вашиот фестивал “Охридско Лето“-истакна Шмит
Денешната работна средба беше на иницијатива на нашиот иселеник во Германија, Илија Котлароски кој е вљубеник во Охрид и истата ги потврдува заложбите на охридската локална самоуправа да воспостави што е можно поголем број контакти со наши пријатели кои ги има секаде во Светот.
